ZONAS PER LA PROTECZIUN DIGL UAUL E DALLA SELVASCHINA
naven dils 15 da december entochen ils 30 d'avrel

Preziai catschadurs, preziadas catschaduras, preziai Tuatschins e preziai hosps da vacanzas

Per spargnar energia, drovan ils animals selvadis igl unviern territoris da ruaus, nua ch'els vegnan buca disturbai. Aschia eisi era impurtont da buca spassegiar atras quellas zonas da protecziun digl uaul e dalla selvaschina. Naven dils 15 da december 2020 entochen ils 30 d'avrel 2021 vala ei puspei: Respect the wildlife! Las zonas ein marcadas verd e las sendas ein serradas giu.

1. La zona per la protecziun digl uaul e dalla selvaschina cumpeglia spazis da viver d'animals, cunzun ils territoris, nua che la selvaschina passenta igl unviern.

2. Naven dils 15 da december entochen ils 30 d’avrel eis ei buca lubiu da far, preparar e marcar pistas, loipas, vias da scursalar ni auters indrezs per far sport. La suprastonza communala sa relaschar scamonds d'access e da traffic ni lubir excepziuns en cunvegnientscha cun ils organs da survigilonza da catscha e cun il survetsch forestal.

3. Vehichels a motor astgan vegnir duvrai mo per dievers agricols e forestals. Resalvadas ein en general mesiras d'urgenza e da salvament, sco era mesiras da tgira e da protecziun en cunvegnientscha cun ils organs da survigilonza da catscha e cun il survetsch forestal.

4. Las zonas per la protecziun digl uaul e dalla selvaschina vegnan marcadas tenor las directivas digl Uffeci da catscha e pesca e dalla Cumissiun cantunala per la protecziun dalla selvaschina. Ils proprietaris da beins immobiliars ston tolerar mesiras da tgira adequatas. 

Per la protecziun da nos uauls e nossas selvaschinas drova ei era Vies agid. Fagei aschi bien e fagei attents persunas che setegnan buca vid qellas perscripziuns. L' Uniun da catschadurs Badus engrazia per Vossa attenziun e Vies agid.

Culs megliers salids
La suprastonza

NA tier l'iniziativa

«FÜR EINE NATURVERTRÄGLICHE UND ETHISCHE JAGD

- Website (Nein zur Bedrohung von Wald, Wild & Jagd! (nein-zur-bedrohung-von-wald-wild-jagd.ch)

- facebook

- instagram

INVITAZIUN AL DI DA TGIRA
Sonda, ils 8 da matg 2021

Preziai commember(a)s, catschadur(a)s e candidat(a)s

La primavera ei arrivada, la neiv ei ussa bein svanida ed il coronavirus ha era schau suenter in tec. Igl ei ussa temps per nus da far il di da tgira. Il di da tgira ei per noss’uniun da gronda muntada. Nus generein ina beinvegnida entrada e savein curclar aschia in bien ton dils cuosts annuals.

Adatg!
La suprastonza supplichescha instantamein tuts commembers dall’uniun da separticipar a quei di da tgira. Per bucca generar nunnecessaris cuosts stuein nus saver il diember dils participonts. Tgi che sa buca prender part quei di ei supplicaus da dar part l’absenza tochen gievgia, ils 6 da matg 2021 a nies cautgira Clau Giusep Monn sut 079 378 53 96 ni sut: clau.giusep.monn@gmx.ch. 

Nus engraziein a Vus e selegrein sin in bien seveser
Culs megliers salids
La suprastonza